ശാസ്ത്രത്തിന്റെ വിജയം: സ്പേസ് എക്സ് റോക്കറ്റ് വിജയകരമായി തിരിച്ചെത്തി

അപർണ തെക്കേതിൽ

അമേരിക്കൻ ബഹിരാകാശ കമ്പനിയായ സ്പേസ് എക്സ്  റോക്കറ്റ് വിജയകരമായി ഭൂമിയിലേക്കു തിരിച്ചിറക്കിയത് ആധുനിക ശാസ്ത്രത്തിന്റെ ഒരു ഉത്സവ നിമിഷമാണ്. ഇത് ഒരു സാങ്കേതിക വിജയം മാത്രമല്ല.  മനുഷ്യ ബുദ്ധിയുടെയും കഠിനാധ്വാനത്തിന്റെയും വിജയമാണ്.

ഇതിനു മുൻപ് റോക്കറ്റുകൾ ഒരിക്കൽ മാത്രം ഉപയോഗിക്കുന്ന വസ്തുക്കളായിരുന്നു.  ദൗത്യം പൂർത്തിയാക്കിയ ശേഷം അവ നശിച്ചു പോകുമായിരുന്നു.  അതുകൊണ്ട് ഓരോ വിക്ഷേപണവും അത്യന്തം ചെലവേറിയതായിരുന്നു.  സ്പേസ് എക്സ്  തെളിയിച്ചത്, ബഹിരാകാശത്തേക്ക് പോകുന്ന റോക്കറ്റുകൾ സുരക്ഷിതമായി തിരിച്ചിറക്കി വീണ്ടും ഉപയോഗിക്കാമെന്നതാണ്.

ദൗത്യം വെട്ടിച്ചുരുക്കി മടങ്ങിവരവ് ഒന്നര മാസം ചുരുക്കിയെങ്കിലും അഞ്ചുമാസത്തെ ബഹിരാകാശ ജീവിതത്തിനു ശേഷമുള്ള ഈ മടക്കയാത്ര ചരിത്രം കുറിക്കുകയായിരുന്നു. യൂ.എസ്, റഷ്യ, ജപ്പാൻ എന്നിവിടങ്ങളിൽനിന്നുള്ള നാലു പേരാണ് ഇലോൻ മസ്കിന്റെ സ്പേസ്-എക്സ് ഡ്രാഗൺ പേടകത്തിൽ സുരക്ഷിതമായി മടങ്ങിയെത്തിയത്. 

ഏഴ് പേർ ഉണ്ടായിരുന്ന ബഹിരാകാശ നിലയത്തിൽ ഇനി നാസയുടെ ക്രിസ് വില്യംസും റഷ്യയുടെ രണ്ട് ബഹിരാകാശ സഞ്ചാരികളും മാത്രമേയുള്ളൂ. ഒരു സഞ്ചാരി രോഗബാധിതനായതിനെ തുടർന്നാണ് നാലുപേർ മങ്ങിയെത്തിയത്. ആർക്കാണ് അസുഖമെന്നോ എന്താണ് അസുഖമെന്നോ ഇപ്പോൾ വ്യക്തമല്ല.

സുരക്ഷിതമായ ഈ തിരിച്ചിറക്കം  ബഹിരാകാശ ദൗത്യങ്ങളുടെ ചെലവ് വൻതോതിൽ കുറയ്ക്കുമെന്നതാണ് ഏറ്റവും വലിയ നേട്ടം.  ചെലവ് കുറയുമ്പോൾ കൂടുതൽ ശാസ്ത്രീയ പരീക്ഷണങ്ങൾ നടത്താൻ കഴിയും.  പുതിയ ആശയങ്ങൾ പരീക്ഷിക്കാൻ ശാസ്ത്രജ്ഞർക്ക് കൂടുതൽ സ്വാതന്ത്ര്യം ലഭിക്കും.

ഉപഗ്രഹ വിക്ഷേപണ രംഗത്തും വലിയ മാറ്റമാണ് ഇത് സൃഷ്ടിച്ചിരിക്കുന്നത്.  കാലാവസ്ഥാ പഠനം, ഭൂമിയുടെ പരിസ്ഥിതി നിരീക്ഷണം, ദുരന്ത മുന്നറിയിപ്പ് സംവിധാനം, ആഗോള ആശയവിനിമയം തുടങ്ങിയ എല്ലാ മേഖലകൾക്കും ഇത് ഗുണകരമാണ്.  ശാസ്ത്രം മനുഷ്യന്റെ ദൈനംദിന ജീവിതവുമായി  എങ്ങനെ ബന്ധപ്പെടുന്നു എന്നതിന്റെ മികച്ച ഉദാഹരണമാണ് ഇത്.

ബഹിരാകാശ യാത്ര മനുഷ്യ ശരീരത്തിന് വെല്ലുവിളിയാണ്.  ഭാരരഹിതമായ അവസ്ഥ, റേഡിയേഷൻ വികിരണം, ദീർഘകാലമുള്ള ഒറ്റപ്പെടൽ എന്നിവ ആരോഗ്യ പ്രശ്നങ്ങൾ ഉണ്ടാക്കാം.  ഒരു അസ്‌ട്രോനോട്ടിന് ആരോഗ്യപ്രശ്നങ്ങൾ ഉണ്ടായത് ശാസ്ത്രലോകത്തെ ഭയപ്പെടുത്തുന്ന സംഭവമല്ല, മറിച്ച് പഠിക്കേണ്ട ഒരു പാഠമാണ്.

ആ ആരോഗ്യ പ്രശ്നം പോലും ശാസ്ത്രത്തിന് ഒരു പുതിയ ചോദ്യമായി മാറി.  മനുഷ്യ ശരീരം

ബഹിരാകാശത്തിൽ എങ്ങനെ പ്രതികരിക്കുന്നു? 

എങ്ങനെ കൂടുതൽ സുരക്ഷിതമായ ദൗത്യങ്ങൾ രൂപകൽപ്പന ചെയ്യാം?  ഈ ചോദ്യങ്ങൾക്ക് ഉത്തരം കണ്ടെത്തുന്നതിലൂടെയാണ് ശാസ്ത്രം മുന്നേറുന്നത്.

അസ്ട്രോനോട്ടിന്റെ ആരോഗ്യത്തെ സംരക്ഷിക്കാൻ ഡോക്ടർമാരും ശാസ്ത്രജ്ഞരും ചേർന്ന് പ്രവർത്തിക്കുകയായിരുന്നു.  മെഡിക്കൽ ശാസ്ത്രവും ബഹിരാകാശ ശാസ്ത്രവും കൈകോർക്കുന്ന നിമിഷങ്ങളായിരുന്നു അത്.  അപകടങ്ങൾ ഒഴിവാക്കാനല്ല, അവയിൽ നിന്ന് പഠിക്കാനാണ് ശാസ്ത്രം നമ്മെ പഠിപ്പിക്കുന്നത്.

ഇത്തരത്തിലുള്ള അനുഭവങ്ങളാണ് ഭാവിയിലെ ദൗത്യങ്ങൾ കൂടുതൽ സുരക്ഷിതമാക്കുന്നത്. ചന്ദ്രനിലേക്കുള്ള യാത്രയും, ചൊവ്വയിലേക്കുള്ള ദൗത്യങ്ങളും ഇതോടെ കൂടുതൽ യാഥാർത്ഥ്യമാകുന്നു.  മനുഷ്യൻ ബഹിരാകാശത്തിൽ ദീർഘകാലം ജീവിക്കാൻ കഴിയുമോ എന്ന ചോദ്യത്തിന് ശാസ്ത്രീയ ഉത്തരങ്ങൾ കണ്ടെത്താൻ ഇത് സഹായിക്കുന്നു.

സ്പേസ് എക്സിന്റെ  ഈ വിജയം ശാസ്ത്രത്തിനായി കൂടുതൽ മൂലധനം നിക്ഷേപം നടത്തേണ്ടതിന്റെ ആവശ്യകത ഓർമ്മിപ്പിക്കുന്നു.  ശാസ്ത്രം ഒരു ആഡംബരമല്ല.  മനുഷ്യരാശിയുടെ ഭാവിക്കുള്ള അടിസ്ഥാനമാണ്.

ഈ റോക്കറ്റ് ലാൻഡിംഗ് ഒരു കമ്പനിയുടെ നേട്ടം മാത്രമല്ല.  മുഴുവൻ മനുഷ്യരാശിയുടെയും ശാസ്ത്രീയ മുന്നേറ്റത്തിന്റെ ആഘോഷമാണ്.  ചോദ്യങ്ങൾ ചോദിക്കാനും, പരീക്ഷിക്കാനും, പരാജയങ്ങളിൽ നിന്ന് പഠിക്കാനും മനുഷ്യൻ തയ്യാറായാൽ  ആകാശം പോലും അതിരല്ലെന്ന് ശാസ്ത്രം വീണ്ടും നമ്മെ ഓർമ്മിപ്പിക്കുന്നു.